Luk 11 | TVK | STEP | E melengien tei, Iesu di misis e rute tei. E melele xa misis bus, moletin tei nan biteni mini bitene, “Suv, pispisi mi xamem ni suse te sisen xa momal ixoni ngan taxa Sion xa di tekas moletin xil di tepispisi mi moletin nan xil.

Luke 11

Iesu Pispisi Usil Suse te Sisen

Luk 11:1-13

1 E melengien tei, Iesu di misis e rute tei. E melele xa misis bus, moletin tei nan biteni mini bitene, “Suv, pispisi mi xamem ni suse te sisen xa momal ixoni ngan taxa Sion xa di tekas moletin xil di tepispisi mi moletin nan xil. 2 Ma Iesu biteni mi xil bitene, “Melele xa musis, muhitene imak:

'Tamemem, mamerere ni hisom xa be Eo.
Masis tengan xa umei uhe suv toto
te meulien na moletin xil te ut etan.
3 Sa anien mi xamem ipin te melengien xil vus.
4 E uketeh ihos li mi xamem melele xa mapol misa minuk,
vengan xa vehakut, xamem mun di maketeh ihos
mi ngan xil xa di lapol misa mi xamem.
Onamae ni ti sakpisien xa ipol ni mumot e tesaen.'”

Iesu Dei Vole Usil Sexien te Sisen

Luk 11:5-13

5 Di, Iesu biteni mi moletin nan xil bitene, “Xosxa tei xamim vahe tim sa tua tei nan e hilaep te vongien e vasisi vahitene, ‘?Tuak, okila osa ti anien minou? 6 Vengan xa tua tei navan nggo sotin bemei e tim savan, e anien tovuol xa nasa ni mini.’

7 “Ma ngan xa de nim vasepin rilomun vamei mi xouk vahitene, ‘!Ei, onasa polien ti minou! Puiteh mikoe ngamu, e horamue navan xil mun lapat ladel nou tuei. !Ma nasakras namea nasa neta tova minuk!’ 8 Nabiteni mi xamim, tave ti neta xa bit namea ti e nasa ti anien minuk vengan xa xouk obe tunali, e vengan xa otave unoun ti e dat osisi, osisi, osisi vuma xi mikila imea e isa holesok xil vus minuk xa iem bei.

9 “Mak, ma nabiteni mi xamim, xosxa iemim bei neta ngan, musis Hi ven ma mukila muhuri. Xosxa mulang ni, ma mukila mukameti. E xosxa murei puiteh ven, ma mikila isah puiteh mi xamim. 10 Vengan xa ngan xil vus xa di lasis neta langguri; e ngan xil xa lalang ni neta likameti; e mikila isah puiteh mi moletin xil xa di larei. 11 ?Xos xouk xa obe tata tei, e natumali misisuk xa bit va meseo tova, 12 ukila usa tetal xa misa sung mini? ?Mu xosxa misisuk bit va rel tuto, ma ukila usa hat ^{▼▼11:12 Luk bit 'scorpion.'} xa minggan mini? 13 Mak, ma tave ti neta xa mube moletin tesa xil, e mukila di musa neta xa bos mi horamue namim xil. Ma, nabiteni mi xamim, Tamemim xa de ut nesao xa bos mu mili, ti isa Ninin Eo nan mi ngan xil xa di lasisi.”

Rut Moletin Labit Iesu Pol ni Polien Nan Nggo Xeihen na Temat

Luk 11:14-23

14 Vatei, Iesu pus moletin tei xa ninin tesa da en xa misak ni be vut, misakras vasepin. Ma Iesu minggol rati be relingi e moletin ak di misepin. Moletin xil xa lapusi latemanin ni. 15 E rute ngan xil labiteni labitene, “Belsepul ^{▼▼11:15 ‘Belsepul’ be his tei te xaren xa di lakes Temat ni xa koute teni be ‘Suv na angalu xil’.} xa be suv na ninin tesa xil iaxa di misa xeihen mini, misak ni mikila minggol rerat ninin tesa ra moletin xil.” 16 E rut moletin sav ngan xil labit lisak pis Iesu, ma lasisi tengan vapol ni merekel tova vaxo ut nesao mi xil tengan vapisen ni xa xeihen na Hi di mini.

17 E Iesu mikil nenemien nae ma biteni mi xil bitene, “Xosxa moletin xil na suv toto tei di labae mi xil, ma xeihen na suv toto ak mei ihe neta sav tang. E xosxa moletin xil xa labe vatimol tei di labae mi xil, ma his vatimol ak ikesae. 18 Ma xosxa ninin tesa xil na Belsepul di labae mi xil, ma xi ihur xeihen itep? Nasepin ni mak, vengan xa mubitene inou nanggol rerat ninin tesa ra moletin xil nggo xeihen na Belsepul. 19 E xosxa mak, ma midep mi moletin namim xil? ?Xil langgol rerat ninin tesa xil ra moletin xil del xeihen na visi? Xil iaxa di lapisen ni xa neta xa musepin ni tamal ti. 20 ?E xosxa inou di nanggol rerat ninin tesa ra moletin xil nggo xeihen na Hi, ma ngan ak di pisen ni xa Hi mistal tuei e be suv toto te meulien na moletin xil.

21 “Belsepul nggoni moletin te xeih tei xa di bue xat kuh xi del holesok xil nan te vaeen. Mak, ma xi mikila iketeh kuhi xol nim man, e neta ti mei napangei holesok nan xil. 22 E melele xa tei xa nggeih mili mei mistal mini e bas tan ni, xi ileh rerat holesok xil te vaeen itel holesok xil te nim man. Xi ileh rerat vuol ni e iseti mi moletin nan xil.

23 “Mak, ma ngan xil xa latamos ti vatel nou, xil di labae minou; e ngan xil xa latatutou ni nou ti tengan laleh vituei ni moletin vaxoni sipsip xil, xil di langgol rerat xil laloh tasil.”

Ninin Tesa xa Be Reling Moletin Mikila Itilomun

Luk 11:24-26

24 Di, Iesu biteni mi xil bitene, “Melele xa ninin tesa be reling moletin tei ba, di mikakao e uruvuol tengan vakamet rute tova xa bos te ngel en. E xosxa takamet ti, ma xi misep tasen bitene, ‘Nitilomun nihe nim mavan xa natexo en natemei.’ 25 Ma dilomun ba, e mikameti xa nim ak langgur revi tuei. 26 Mak, ma ba milang ni ninin tesa sav xil xa labe lu e he sav (7) xa lasa mu mili. E ileh xil vus limei liti en. Nim ak be meulien na moletin, e xil lisak ni meulien nan isa mu ili ngan xa teta en te tiamu.” ^{▼▼11:26 Melele xa ninin tesa tei be reling moletin tei, xosxa tamaen ni ti Ninin Eo mei napolu e meulien nan, ma ninin tesa ak ikila imei rilomun en.}

Moletin xa Pol Nggusil Sepinien na Hi Ihur Tuxolxatien Nan

Luk 11:27-28

27 Melele xa Iesu di tamu misepin ni holesok xil ak, atou tei xa de hilaep te moletin xil mikei ba ni bitene, “Nabit Hi misa tuxolxatien mi nana nam xa telinguk e telaxat kuh xouk.”

28 E Iesu misa rilomun ni sepinien ba ni atou ak bitene, “E ngan xil xa di lalong sepinien na Hi e di lapol nggusili, xil iaxa, Hi ituxol xat xil.”

Moletin Xil Iexil Bei Lapus Merekel Tova

Luk 11:29-32

29 Melele xa moletin xil mei labe holu, Iesu misepin mi xil bitene, “Moletin xil te xosali ak lasa tang. Di lasis nou tengan lipus merekel tova, e Hi napol ni ti neta. Xil ak lipus merekel na Siona kestang. 30 Merekel xa testal mi Siona ^{▼▼11:30 Siona 2:17 bit Siona de vang lerumrum melengien tol, e tamat ti.} tepisen ni xa sepinien xa Hi tesa ni mini tengan vasa ni mi mol Nineve xil tehe reitin. Mak, ma Hi ipol ni mak mi Nat Moletin tengan ipisen ni mi moletin xil te xosali ak xa sepinien nan be reitin. 31 E Melengien te Lepisien, moletin xil te xosali limeul rilomun ra maten tengan Hi ilepis xil. E melele nen ak, Kuin tahal Siba xa tave Siu ti imeul mun, e isepin ixeih xat xil. Xi ipol ni mak vengan xa tekakao sotin temei tengan valong sepinien te metisouen na Suv Toto Solomon te tiamu. !E taxeak, tei xa mili Suv Toto Solomon da xiak e xil di lasin ni! 32 E moletin xil tahal Nineve mun xa latave Siu ti limei e lisepin ixeih xat moletin xil te xosali ak, vengan xa xil latehiles meulien nae melele xa latelong provet Siona tesetu mi xil. !E taxeak mupusi, tei xa mili provet Siona da xiak e xil di lasin ni!”

Iesu Dei Vole Usil Laet

Luk 11:33-36

33 Di, Iesu dei vole tei mi xil bitene, “Moletin tovuol tamu xa vasahan laet nan, ti, ha vasoso ni mu vakutaxole ni pesin tei. !Tamak ti! Melele xa misahan ni bus, poe ba misoxolein ni de kesao. Mak, ma melele xa moletin ngan bemei e nim mikila vapus ut valeluv. 34 Mete xir mun nggoni laet te tenbe xir. Melele xa mete xir di bos, radi e miehen e tenbe xir mikila vapol ni holesok xil ngasen. E melele xa mete xir bar, ma radi e maluxoluken e tenbe xir misakras vapol ni neta vahe holu. ^{▼▼11:34 Xosxa muke reitin e sepinien te reitinen, ma meulien namim polu ni miehen. E xosxa mutake reitin ti en, ma meulien namim iti e maluxoluken.} 35 Mak, ma mule kil kuh meulien namim, xa mudi e miehen mu maluxoluken. 36 Xosxa meulien namim di e miehen, e maluxoluken tovuol en, ma meulien namim ileluv kuhi ixoni laet tei xa pili e mileluv kuhi xol xamim.”

Iesu Misepin Nggeih ve Sexien na Parasi Xil Del Tisa Xil te Rae xil na Mosis

Luk 11:37-54

37 Melele xa Iesu misepin bus, Parasi tei mei misisi tengan ha vanien vatela e tim san. Ma Iesu be xalu luba. 38 E Parasi ak mitemanin melele xa pusi xa Iesu takas hen ti e ba dotan tengan vanien. 39 Ma suv Iesu biteni mini bitene, “O reitin, xamim Parasi xil, munggoni kap e pelet te anien en namim xa di mukas moten ni e hale tang, e vangite mumu minggoni tinemi xa polu ni nenemien te hokanen e tesaen xil. 40 !Mube unu xil! Mutakil ti xa Hi xa pol ni hale te neta, xi mun tang iaxa pol ni vangite? 41 E bos xa musa oei xa de vangit kap e anien xa de vangit pelet mi ngan xil xa labe hoeo. Mak, ma meulien namim imese kuhi pe met Hi.

42 “Isa pupu mi xamim, Parasi xil, ve pangasien xil xa imei e xamim. Di musa taet mi Hi ni tutut uvei xil te kuk en xa pol ni vo anien bos. E di mutapisen eheien namim ti mi Hi mu mi mosav xil usil sexien xa momal xa ti mupol ni. Ti mupisen eheien namim vatiamu, ti, mupol ni tutut taet namim sung vatutou.

43 “Isa pupu mun mi xamim, Parasi xil, vengan xa di mubosei von totanen na eilep xil e nim xil te pispisien. E von maket mun, iemim bei xa moletin xil ti lihur pilei xamim e ti limerere ni xamim. 44 Isa pupu mi xamim, vengan xa xamim, meulien namim tamemese ti. Munggoni von tehinen xil xa latasimele ti vati en, xa moletin xil di lakakao xati e latakil ti xa neta vutei bo di en.”

45 Tei e xil xa be tisa te Rae xil na Mosis biteni mi Iesu bitene, “Tisa, melele xa osepin mak, opangei xamem mun vari vengan xa sexien holu namim mak tang.”

46 Ma Iesu biteni mini bitene, “Isa pupu mun mi xamim tisa xil te Rae xil na Mosis, vengan xa musa rae xil holu mi moletin xil xa nggoni eipo xa meas pupu. Misak ni, xil lasakras lapoe, e xamim di mutapol ni ti neta tova vatutou ni xil ni eipo xil ak. 47 Isa pupu mun mi xamim, vengan xa di mupol kuhi ni tutut nim xil da xol von tehinen na provet xil xa avu namim xil mun tang te tiamu latehas vin xil. 48 Xil latehas provet xil, e xamim di mupol ni nim tehinen nae. Mak, ma di mupisen ni xa mubit avu namim xil lapol ni sexien tei xa bos. 49 Ngan ak nggoni naha xa Hi xa be metisou pupu tehiteni tehitene, 'Inou nisil provet itel eloheoh navan xil liha mi xil. E xil ak lihas ngan xil lilel e lisak ni ixeih mu mi ngan tesav xil.' 50 Mak, ma ve moletin xil te xosali ak da nga lapol sexien ak, Hi isa pangasien mi moletin xil te xosali ak ve re provet xil xa de he avu namim xil, e melele xa Hi tepeas ni ut etan ma duxoh xosali, re ak de hemim mun. 51 Reitin mak nabitene mi xamim, e melele xa avu namim xil latehas vin Evel duxoh melele xa latehas vin Sakaraea hilaep te hor te sanien del Nim Eo na Hi, Hi isa longpangasien ve maten xil ngasen nae mi xamim vus te xosali ak.

52 “Isa pupu mun mi xamim tisa xil te Rae xil na Mosis, vengan xa moletin xil labit lamei visal Hi e munggur soson ki te puiteh xa xil lava en tengan lakila en. !Xamim iemim ti tavei muve puiteh ak, e musikoe xol moletin sav xil mun xa iexil bei lave en e lamei visal Hi!”

53 E melele xa Iesu be ling nim ak, tisa xil te Rae xil na Mosis del Parasi xil, iexil mikati pupu. Misak ni, e melengien ak ba, xil latesis rovui ni sispileien xil holu xa xeih tengan vasak ni Iesu vasep usil neta holu. 54 Xil lateling xati tengan lasak ni Iesu vamot e sepinien nan.